Университет ҳақида

12 January, 2021

1945-йил 1-сентябрда Бухоро бирлашган педагогика ва ўқитувчилар институтининг Қарши филиали сифатида фаолият бошлаган мазкур филиал 1949-йил 27-октябрда икки йиллик ўқитувчилар тайёрлаш институтига, 1956-йил августидан Қарши давлат педагогика институтига айлантирилган. Ўзбекистон Республикаси Вазирлар Маҳкамасининг 1992-йил 11-мартдаги “Ўзбекистон Республикаси Президентининг 1992-йил 28 февралдаги “Янги олий ўқув юртлари тузилиши ҳақида”ги Фармонининг бажарилиши чоралари ҳақида”ги 125-сонли Қарори билан Қарши давлат университети мақоми берилди ва таълим муассасасида шу давр мобайнида мамлакатимиз иқтисодиёти соҳа ва тармоқлари учун 70 минг нафардан ортиқ, шундан 30 минг нафарга яқин малакали кадрлар мустақиллик йилларида тайёрланди.

“Таълим тўғрисида”ги Қонун ва “Кадрлар тайёрлаш Миллий дастури”нинг қабул қилиниши билан узлуксиз таълим тизими орқали замонавий кадрлар тайёрлашнинг асоси яратилди. Ўзбекистон Республикаси демократик, ҳуқуқий ва фуқаролик жамиятини қуриш йўлидан бораётган бир пайтда таълим соҳасида амалга оширилаётган ислоҳотларнинг бош мақсади ва ҳаракатга келтирувчи кучи ҳар томонлама ривожланган баркамол инсонни тарбиялашдан иборатдир.

Университетда моддий-техник базанинг ривожланиши, Давлат таълим стандартларининг такомиллаштирилиши, рейтинг тизимининг ўқув жараёни асосини ташкил этиши, ўқув адабиётлари ва электрон ахборот таълим ресурслари билан таъминланишининг талаб даражасида бўлиши – юқори малакали, рақобатбардош кадрлар тайёрлаш учун мустаҳкам база ҳисобланади.

 Мустақиллик руҳини талабалар онгига сингдириш, озодлик, ватанпарварлик кайфиятини қарор топтириш ўтилаётган ҳар бир дарснинг асосий мақсадига айлантирилган. Ўқув жараёни илғор педагогик ва  ахборот  технологиялари асосида ташкил этилмоқда.

Университетда 8 та: Ижтимоий фанлар, Филология, Хорижий тиллар, Педагогика, Санъатшунослик, Физика-математика, Табиий фанлар, Жисмоний маданият факультетлари ҳамда 37 та кафедра фаолият кўрсатади.

Университетнинг 39 та бакалавриат таълим йўналиши ва 19 та магистратура мутахассисликларида 2019-2020 ўқув йили ҳолатида 12200 нафар (шулардан, бакалавриатда -7636 нафар, махсус сиртқида-2209 нафар, сиртқи таълимда-1363 нафар, иккинчи мутахассислик-806 нафар, магистратурада 186 нафар) талаба таҳсил олмоқда.

Университетда 600 нафарга яқин профессор-ўқитувчилар фаолият олиб боради. Улардан 193 нафари илмий даражали профессор-ўқитувчилардир. Шундан 25 нафари фан доктори, профессорлар, 143 нафари фан номзоди, доцентлар ва 25 нафари фалсафа доктори (ПҳД). Илмий салоҳият 33% ни ташкил қилади.

Университет қошида академик лицей фаолият кўрсатади. Шу билан бир қаторда "Ахборот ресурс маркази", "Ахборот технологиялари маркази", "Ноширлик", "Қатағон қурбонлари хотираси" музейи, "Вилоят минтақавий тил ўрганиш", "Кураш", "Соғломлаштириш", "Тикувчилик" марказлари мавжуд.

Ўқув жараёнини Давлат таълим стандартларида кўрсатилган талаблар асосида олиб бориш мақсадида 17та ўқув лабораториялари, 6та лингафон синфлари, устахоналар, тажриба ишлаб чиқариш майдончалари ташкил  этилган.

 Ахборот ресурс маркази (АРМ)да бепул интернет хизмати йўлга қўйилган. Шунингдек, видеоконференция қурилмалари мавжуд бўлиб, ўқув жараёнларида самарали фойдаланилмоқда. АРМда 220 ўринли ўқув заллари мавжуд.

Ахборот-ресурс марказининг умумий китоб фонди 323666тани ташкил этади. Шундан 70364таси дарслик ва 74115таси ўқув қўлланмалардир. Фонд 2018-йилда 4675 дона янги китоблар билан тўлдирилди.

Таълимнинг сифат ва самарадорлигини ошириш учун ахборот ресурс марказида 239 та фандан электрон ўқув-услубий мажмуалари жамланган.

Замонавий ахборот технологияси ва янги педогогик технологияларини ўқув жараёнига татбиқ этиш учун 18 та электрон доска, 54 та видеопроектор ўрнатилди. Ўқув жараёнига 511 дона компьютер, деканат, кафедралар ҳамда бўлимларда 312 та компьютерлар фойдаланилмоқда. Университетда 686 дона компьютер корпоратив тармоқ ҳамда Интернет тармоғига уланган.

Халқаро ҳамкорликлар доирасида қуйидаги лойиҳалар амалга оширилмоқда:

Корея элчихонасига қарашли КОИCА ташкилоти билан 2010 йилда шартнома тузилган бўлиб, 2017 йилнинг 19 июнидан 2019 йилнинг 25 майигача корейс тилидан Ким Ёнг Нам, тиббиёт бўйича Ким Wоо Теа фаолият олиб борган бўлса, 2018 йилнинг 25 майидан 2020 йилнинг 27 майигача тасвирий санъат бўйича волонтёр Wон Еи Жи университетда ўз фаолиятларини юритадилар. 2019 йил 25 майда волонтёрлар Ким Ёнг Нам ва Ким Wоо Теа ўз фаолиятларини муваффақиятли якунладилар. 2019 йил 22 майдан 2021 йил 25 мартгача корейс тили волонтёри Ким Еонунг университетда ўз фаолиятини бошлади. Жумладан, Мактабгача таълим йўналиши волонтёри Лее Ёунг ЛИ университетдаги фаолиятини 2019 йил 26 августдан 2021 йил 1 июлгача давом эттиради. 2019 йил 4 июлда КОИCА ташкилоти Ўзбекистондаги ваколатхонаси томонидан Қашқадарё вилояти ижтимоий, таълим соҳаси ходимларига КОИCА волонтёрлик дастури ва волонтёр таклиф қилиш тартиби хусусида КОИCА директори ўринбосари Пак Ми ва А.Шомирзаев томонидан семинар ўтказилди. АҚШнинг Фулбрайт дастури доирасида Кате П.Пҳиллипс инглиз тили йўналиши талабаларига инглиз тилидан дебат усулида машғулотлар олиб бормоқда. Университетда 2010 йилдан буён Туркманистон фуқароларига таълим хизмати экспорти бўйича ҳамкорлик ишлари муваффақиятли амалга оширилмоқда. 2019-2020 ўқув йилида 25 нафар Туркманистон ёшлари бакалавриат таълим йўналишига ҳужжат топширди. Мазкур ўқув йилида 5 нафар 4-курсда, 16 нафар 3-курсда, 30 нафар 2-курсда, 25 нафар 1-курс ва 1 нафар талаба магистратурада таҳсил олмоқда. 2018-2019 ўқув йилида 12 нафар хорижий фуқаролар Якуний давлат аттестациясини муваффақиятли топширишди. Шунингдек, 2019-2020 ўқув йилида 1 нафар Тожикистон фуқароси, 2 нафар Россия Федерацияси фуқаролари университетга ўқишга қабул қилинди.

2019 йилда университет АҚШнинг Жаҳон банки ва Халқаро Ривожланиш Ассоциацияси, ОЎМТВнинг Академик инновацион фондининг 2 лойиҳасида иштирок этмоқда.

“Ўзбекистон олий таълим муассасаларида таълим жараёнини ташкил этишда янги технологиялар” (“МТ+ТББ 18” модели). Лойиҳа маблағи – 140 000 АҚШ доллари; Лойиҳанинг муддати: 01.03.2019- 01. 03.2021 й.й.;

Лойиҳа ҳамкорлари: Қарши давлат университети, Белгород давлат Миллий тадқиқотлар университети (Россия); Бухоро давлат университети, Олий ва ўрта махсус таълим вазирлиги ва ЎзРДТМ.

Лойиҳанинг мақсади: Талабаларнинг билимини баҳолашда шаффофликка асосланган технологиялар ишлаб чиқиш; Профессор-ўқитувчилар фаолиятини баҳолаш учун такомиллашган механизмни ишлаб чиқиш; Масофавий таълимни жорий этиш учун дастлабки шароитлар яратиш.

“Қарши давлат университети ва Қашқадарё вилоятидаги ишлаб чиқариш корхоналари ўртасида талабаларни ўқитиш сифатини яхшилашга қаратилган муносабатларни мустаҳкамалаш”. Лойиҳа маблағи – 91 000 АҚШ доллари; Лойиҳанинг муддати: 01.03.2019- 01. 03.2021 й.й.;

Лойиҳа ҳамкорлари: Қарши давлат университети, Тошкент давлат техника университети, Қарши муҳандислик-иқтисодиёт институти, Қашқадарё вилояти ишлаб-чиқиш корхоналари.

Лойиҳанинг мақсади: олий таълим муассасалари профессор-ўқитувчиларининг фаолиятини баҳолашнинг такомиллашган механизмини ишлаб чиқиш, етакчи корхоналарда мавжуд бўлган замонавий ишлаб чиқариш технологиялари ва ускуналарида профессор-ўқитувчиларнинг малакасини ошириш, ишлаб чиқариш корхоналарини илмий ва технологик муаммолари асосида талабаларнинг магистрлик диссертациялари ва битирув малакавий ишларини ташкил этиш, корхоналарда ишлаб чиқариш талабларини ҳисобга олган ҳолда ўқув дастурларини ишлаб чиқиш, корхоналарнинг кадрларга бўлган эҳтиёжларини ўрганиш, уларни мақсадли тайёрлашни йўлга қўйиш.

2019 йил 11-13ноябрда Белгород давлат миллий тадқиқот университети ректори Полухин Олег Николаевич бошчилигида делегация университетга ташриф буюрди. Делегация аъзолари Белгород давлат миллий тадқиқот университети Халқаро алоқалар бўйича проректори Кучмистий Владислав Анатолевич, Ер фанлари институти директори Игнатенко Игнат Михайлович, Таълим сиёсати департаментининг ўқув жараёнини режалаштириш ва ташкил этиш бўлими бошлиғи Шевченко Валентина Николаевналардан иборат бўлиб, учрашувда ҚарДУ ва Белгород давлат миллий тадқиқот университети ўртасидаги шартномага мувофиқ самарали ҳамкорликнинг келгуси истиқболи муҳокама қилинди. Мактабгача ва Бошланғич таълим, Биология йўналишларида қўшма таълим дастури имзолашга келишиб олинди ҳамда қўшма таълим марказининг очилиш маросими бўлиб ўтди.

2018-2019 йилларда 10 нафар талабалар Президент ва Давлат стипендиялари ғолиблари бўлишди. Жумладан, 1 нафар талаба Президент, 5 нафари Навоий, 2 нафари Мирзо Улуғбек, 2 нафари Ислом Каримов номидаги Давлат стипендияси совриндорлари бўлишди. Бундан ташқари иқтидорли талабалардан 17 нафари 30га яқин халқаро, 21 нафари 38га яқин республика миқёсидаги танлов ҳамда спорт мусобақаларида фаол иштирок этиб ғолибликни қўлга киритишди.

2018-йил Индонезиянинг Жакарта шаҳрида ўтказилган ИИИ Параосиё ўйинларида Жисмоний маданият факультети спортчи-талабаларидан Тошпўлатова Шоҳсанамхон 3 та олтин, 4 та кумуш медалларини қўлга киритиб, 400 метрга эркин сузиш бўйича Осиё рекорди, 100 метрга батерфлей усулида сузишда Осиё рекорди, 100 метрга чалқанча сузиш бўйича Осиё рекордини, Амилова Фотимахон 4 та олтин, 2 та кумуш, 1 та бронза медалини қўлга киритиб, 100 метрга брасс усулида сузишда Жаҳон рекорди, 200 метрга комплекс сузиш бўйича Жаҳон рекордини, 100 метрга эркин сузиш бўйича Осиё рекордини, 50 метрга эркин сузиш бўйича Осиё рекордини ўрнатди. Қарши давлат университетининг “Зиё” талабалар театр студияси ҳар йили ўтказиладиган республика кўрик-танловларида муваффақиятли иштирок этиб, юқори ўринларни эгаллаб келмоқда. Олий ва ўрта махсус вазирлиги ташаббуси билан 2019 йилнинг 16-18-декабрь кунлари Талабалар форуми доирасида ўтказилган Талабалар театр студиялари фестивалида “Зиё” талабалар театр студияси “Энг яхши спектакль” номинациясида “Наҳшаб афсонаси” спектакли билан биринчи ўринни қўлга киритди.

Университет кафедраларининг аксарияти вилоятдаги академик лицей, касб-ҳунар коллежлари билан ҳамкорлик қилади ва у ерда кафедраларнинг филиаллари ташкил этилган.

Ҳозирги кунда университет дунёнинг нуфузли олий таълим муассасалари ва мамлакатимизнинг 70га яқин олий таълим муассасалари билан видеоконференция ўтказиш имкониятига эга. Жумладан: Ўзбекистон Миллий университети, Тошкент давлат педагогика университети, Тошкент юридик институти, Гулистон давлат университети, Андижон халқ хўжалиги институти, Фарғона давлат университети, Нукус давлат университети ва Қарши муҳандислик иқтисодиёт институтлари билан ҳамда халқаро миқёсда Англиянинг Шимолий Лондон университети ва Филландиянинг Оулу университетлари билан видеоконференциялар ўтказилиб келинмоқда.