Тўмарис издошлари: маҳорат, чидам ва жасорат танлови
28 ноябрь куни Қарши давлат университетида Хотин-қизлар билан ишлаш ва психологик маслаҳат маркази томонидан "Тўмарис издошлари" мавзусида мусобақа ўтказилди. Унда барча факультетларнинг талаба-қизларидан сараланган жамоалар ғолиблик учун ўзаро кураш олиб борди. Уларнинг маҳоратини баҳолаш учун Миллий гвардия Қашқадарё вилояти бошқармаси ходимлари таклиф қилинди. Куч ва чаққонлик, ирода ва қатъият танлови дастлаб Давлат мадҳияси билан бошланиб, Тўмарис сиймоси гавдалантирилди. Сўнгра иштирокчи жамоалар "узатдингми ўтир", "арқон тортиш", " югур ва мўлжал ол" каби шартлар бўйича беллашишди. Қизғин ва шиддатли руҳда ўтган баҳслар якунида Спорт факультети жамоаси биринчи ўринни эгаллади ҳамда диплом, икки миллион сўмлик ваучерни қўлга киритди. Кимё-биология факультети талаба-қизлари иккинчи ўрин ва диплом, бир миллион саккиз юз минг сўмлик ваучерга, Санъатшунослик факультети жамоаси эса учинчи ўрин ҳамда диплом, бир ярим миллион сўмлик ваучерга эга бўлди. Шунингдек, фаол жамоалар ташаккурномалар билан рағбатлантирилди. Таъкидлаш жоиз, мазкур танлов талаба-қизларнинг бўш вақтини мазмунли ўтказиш, уларни Ватанга содиқлик, мардлик, аждодларга муносиб авлод бўлиш руҳида тарбиялашга қаратилганлиги билан аҳамиятли бўлди.