“Besh tashabbus olimpiadasi”ning respublika final bosqichi boshlandi

Oliy ta’lim, fan va innovatsiyalar vazirligi hamda Sport vazirligi tashabbusi bilan Qarshi davlat universitetida “Besh tashabbus olimpiadasi” doirasidagi oliy ta’lim muassasalari talabalari o‘rtasida ommaviy sport musobaqalarining respublika final bosqichiga start berildi. Joriy yildagi musobaqalar Qarshi davlat universiteti va Qashqadaryo viloyatining boshqa oliy ta’lim muassasalari mezbonligida o‘tkazilmoqda. “Besh tashabbus olimpiadasi” final bosqichining tantanali ochilish marosimida Oliy ta’lim, fan va innovatsiyalar vazirligi, Sport vazirligi rahbarlari, Qashqadaryo viloyati hokimligi vakillari, shuningdek, sport sohasida e’tirof etilgan mutaxassislar marosimning faxriy mehmonlari sifatida tashrif buyurdi. Tantanali marosimda mas’ullar musobaqada qatnashuvchi barcha sportchi-talabalarni qizg‘in qutlab, ularga omad va muvaffaqiyat tiladilar. So‘zga chiqqanlar ushbu olimpiada yoshlarning iqtidorlarini yuzaga chiqarish, jismoniy va ma’naviy barkamol avlodni tarbiyalashda muhim ahamiyatga ega ekanligini alohida ta’kidlab o‘tdilar. “Besh tashabbus olimpiadasi” doirasida musobaqalar oliy ta’lim muassasalari talabalari o‘rtasida sportning mini-futbol, stol tennisi, voleybol, yengil atletika, stritbol turlari bo‘yicha to‘rt bosqichda o‘tkazilmoqda. Joriy yilda 147 ta oliy ta’lim muassasasida sportning 5 turi bo‘yicha musobaqalar o‘tkazildi. Ularda 441 869 nafar talaba ishtirok etdi, shulardan 211 777 nafari qizlardir. Hududiy bosqichlarda g‘olib chiqqan jamoalar Qarshi shahrida 9-13-dekabr kunlari bo‘lib o‘tayotgan respublika final bosqichida ishtirok etmoqda. Joriy yilgi final bosqichida umumiy hisobda 574 nafar ishtirokchi qatnashmoqda.