“Yoshlar korrupsiyaga yo‘q deydi” mavzusidagi tanlovlarning universitet bosqichi bo‘lib o‘tmoqda

Xabar berilganidek, shu kunlarda Qarshi davlat universitetida “9-dekabr — Xalqaro korrupsiyaga qarshi kurash kuni”ga bag‘ishlab “Yoshlar korrupsiyaga yo‘q deydi” mavzusida “Eng yaxshi insho”, “Eng yaxshi videorolik”, “Eng yaxshi rasm”lar tanlovlari hamda “Antikorrupsiya bilimdoni” bellashuvining universitet bosqichi bo‘lib o‘tmoqda.  Jumladan, 28-29-noyabr kunlari “Eng yaxshi rasm” tanlovi va “Antikorrupsiya bilimdoni” bellashuvida g‘oliblar aniqlandi. Xususan, “Eng yaxshi rasm” tanlovida birinchi o‘rinni San’atshunoslik  fakulteti rangtasvir (dastgohli) yo‘nalishi 1-bosqich talabasi Avloqulov Sardor Abdullo o‘g’li  qo‘lga kiritdi. Ikkinchi o‘rin ham ushbu fakultetning 2-bosqich talabasi O‘tayev Xurshid Sherzod o‘g’liga nasib etdi. Fizika fakulteti fizika yo‘nalishi 2-bosqich talabasi Yusupova Nilufar Asror qizi uchinchi o‘ringa loyiq ko‘rildi. G‘oliblar tegishli ravishda 1 500 000 (bir million besh yuz ming), 1 250 000 (bir million ikki yuz ellik ming) va 1 000 000 (bir million)  so‘m miqdorida pul mukofotlari bilan taqdirlanadi. “Antikorrupsiya bilimdoni” mavzusidagi bilimlar bellashuvining universitet bosqichida ishtirokchi jamoalar 3 ta shart asosida o‘z bilim va iqtidorlarini sinovdan o‘tkazishdi. Hakamlar hay’atining yakuniy xulosasiga ko‘ra, 1-o‘rinni Iqtisodiyot fakultetining “Against” jamoasi egalladi va 3 000 000 (uch million) so‘mlik vaucherni qo‘lga kiritdi. 2-o‘rin va 2 500 000 (ikki million besh yuz ming) so‘mlik vaucher Tarix fakultetining “Islohotchilar” jamoasiga hamda 3-o‘rin va 2 000 000 (ikki million) so‘mlik vaucher Kimyo-biologiya fakultetining “Adolat” jamoasiga nasib etdi.