Qarshi davlat universiteti Qozog‘iston universitetlari bilan hamkorlikni kengaytirdi
2025-yilda universitet strategik maqsad sifatida TOP-500 universitetlar bilan qo‘shma ta’lim dasturlarini yo‘lga qo‘ydi. Shu doirada QS reytingiga kirgan M.Auezov nomidagi Janubiy Qozog‘iston universiteti bilan “Lingvistika (rus tili)”, Rossiya Xalqlar do‘stligi universiteti bilan “Turizm” magistratura mutaxassisliklari bo‘yicha qo‘shma dasturlar tashkil etish rejalashtirilgan. 24-28-noyabr kunlari Qarshi davlat universiteti Xalqaro ta’lim dasturlari bo‘limi boshlig‘i N.Azizova M.Auezov nomidagi Janubiy Qozog‘iston universitetiga tashrif buyurdi. Safar doirasida rus filologiyasi yo'nalishi talabalari uchun ma’ruzalar o‘qildi va qo‘shma dastur bo‘yicha shartnoma imzolandi. Unga ko'ra, 2026/2027-o‘quv yilida 10 nafar magistrant 2 kursda tahsil olish imkoniyatiga ega bo‘ladi. Shuningdek, M.Dulati nomidagi Taraz universiteti bilan "Pedagogika" sohasida ham qo‘shma dasturlarni yo‘lga qo‘yish bo‘yicha muzokaralar olib borildi. Hozirda Qarshi davlat universiteti Rossiya va Belarusning nufuzli oliygohlari bilan qator bakalavriat ta'lim yo'nalishlari va magistratura mutaxassisliklari bo'yicha qo‘shma ta'lim dasturlarini amalga oshirmoqda.