"Akademik va yoshlar” uchrashuvi

Qarshi davlat universiteti faollar zalida O‘zbekiston Fanlar akademiyasi Botanika ilmiy-tadqiqot instituti direktori, biologiya fanlari doktori, akademik Komiljon Tojiboev ishtirokida “Akademik va yoshlar” mavzusidagi uchrashuv bo‘lib o‘tdi. Tadbirda biologiya yo‘nalishi talabalari, magistrlar, doktorantlar hamda professor-o‘qituvchilar ishtirok etdilar. Akademik Tojiboev “Yuksak o‘simliklar xilma-xilligi” mavzusida ma’ruza qilib, yoshlar bilan muloqot jarayonida mamlakatimizda ilm-fan, ayniqsa tabiiy fanlarni rivojlantirish bo‘yicha ustuvor vazifalar haqida fikr bildirdi. Yosh olimlarga ilmiy izlanishlarni to‘g‘ri yo‘lga qo‘yish va yuqori natijalarga erishish bo‘yicha qimmatli tavsiyalar berdi. Shuningdek, Prezidentimiz rahnamoligida amalga oshirilayotgan ta’lim sohasidagi islohotlar va QarDUda yaratilgan zamonaviy shart-sharoitlar yuqori baholandi. “Yaratilgan imkoniyatlar yoshlar uchun beqiyos tayanch”, – deya ta’kidladi akademik. Uchrashuv yakunida u talabalarni berilgan imkoniyatlardan unumli foydalanishga, chuqur bilim olishga va kelajakda Vatan taraqqiyotiga munosib hissa qo‘shishga chorladi. Tadbir ishtirokchilar uchun ilmiy faoliyatga bo‘lgan qiziqishni yanada oshirgan mazmunli suhbat bo‘ldi.