Bir Vatan, bir el, bir bayroq!

18-noyabr – O‘zbekiston Respublikasi Davlat bayrog‘i qabul qilingan sana munosabati bilan Iqtisodiyot, San’atshunoslik, Pedagogika fakultetlari hamda 1–3-sonli talabalar turar joylarida “Bir Vatan, bir el, bir bayroq!” shiori ostida keng qamrovli ma’naviy-ma’rifiy tadbirlar o‘tkazildi. Uchrashuvlar davomida Davlat bayrog‘imizning yaratilish tarixi, unda mujassam milliy g‘oya, ranglar ramziy ma’nosi va bugungi kunda yosh avlod qalbida vatanparvarlik tuyg‘ularini kuchaytirishdagi o‘rni atroflicha tushuntirildi. Ishtirokchilar bayrog‘imizda aks etgan xalqimizning asriy orzu-intilishlari, matonati, shijoati hamda milliy o‘zligimizni belgilovchi yuksak qadriyatlar haqida ma’ruzalarni tinglab, o‘zlarida faxr va g‘urur tuyg‘usini yanada mustahkamlashdi. Tadbirning badiiy qismida talaba-yoshlar tomonidan yurtni ulug‘lovchi she’rlar o‘qildi, savol-javoblar tashkil etildi, kuy va qo‘shiqlar ijrosi bilan bayramona ruh yanada oshirildi. Yakunda tadbirlarda faol ishtirok etgan talabalarga esdalik sovg‘alari topshirildi va ularning tashabbuskorligi alohida e’tirof etildi.